KATA ZILIZOACHWA NA MADIWANI CHADEMA 'KUPIGWA MNADA' NOVEMBA 26

TUME ya Taifa ya Uchaguzi (NEC) imetangaza ‘kuzipiga mnada’ Kata 43 katika Halmashauri 36 nchini, zikiwemo kata zilizoachwa na madiwani wa Chama cha Demokrasia na Maendeleo (Chadema) waliokimbilia Chama cha Mapinduzi (CCM).

Uchaguzi mdogo wa madiwani katika kata hizo 43 utafanyika Novemba 26, 2017, huku Chadema wakiendelea kulia na ‘mchezo mchafu’ unaodaiwa kufanywa na madiwani wao watano mkoani Arusha.

Mwenyekiti wa NEC, Jaji Semistocles  Kaijage, amesema uchaguzi huo unafanyika kutokana na sababu mbalimbali ikiwemo baadhi ya madiwani kufariki dunia, kujiuzulu, kutohudhuria vikao na wengine ushindi wao kutenguliwa na Mahakama.

Jaji Kaijage amesema tume imetangaza kufanyika kwa uchaguzi huo mdogo, baada ya waziri mwenye dhamana ya serikali za mitaa kuitaarifu tume uwepo wa nafasi wazi za madiwani katika kata hizo 43 zilizoko katika halmashauri mbalimbali 36 na mikoa 19 ya Tanzania Bara.

Jaji Kaijage ameainisha kwamba kifungu cha 13 (1) cha Sheria ya Uchaguzi ya Serikali za Mitaa, Sura ya 292 kinampa mamlaka waziri mwenye dhamana ya Serikali za Mitaa kuitaarifu Tume kuhusu kuwepo kwa uchaguzi huo mdogo wa madiwani.

Amefafanua kuwa baada ya kupokea taarifa hiyo na kwa kuzingatia masharti ya kifungu cha 13(3) cha Sheria ya Uchaguzi ya Serikali za Mitaa; Sura ya 292, Tume ya taifa ya uchaguzi ina wajibu wa kuitisha na kuendesha Uchaguzi mdogo katika Kata hizo.

“Hivyo, ninapenda kuchukua nafasi hii kutoa taarifa kuwa tume imepanga kuendesha uchaguzi mdogo katika Kata 43 tarehe 26 Novemba, 2017,” alisema Jaji Kaijage.

Amesema ratiba ya mchakato wa uchaguzi huo itaanza Oktoba 26 ambapo kutafanyika uteuzi wa wagombea udiwani na kampeni za uchaguzi huo mdogo zitaanza Oktoba 27 na kumalizika Novemba 25.

Jaji Kaijage amesema Vyama vya Siasa, Wadau wote wa Uchaguzi na Wananchi wanakaribishwa kwa ajili ya kushiriki kwenye uchaguzi huo utakaozingatia ratiba iliyoainishwa hapo juu.

Ametoa mwito kwa vyama vya Siasa na Wadau wote wa Uchaguzi kuzingatia matakwa ya Katiba, Sheria ya Uchaguzi ya Serikali za Mitaa, Kanuni za Uchaguzi wa Serikali za Mitaa (Madiwani) za mwaka 2015, Maadili ya Uchaguzi wa Rais, Wabunge na Madiwani ya mwaka 2015 pamoja na maelekezo yote yaliyotolewa au yatakayotolewa na Tume wakati wote wa Uchaguzi mdogo.

Chadema na Ukawa

Chadema ndicho chama pekee kati ya vyama vinavyounda Umoja wa Katiba ya Wananchi (Ukawa) kilichopoteza viti vingi kwa ama ushindi wa madiwani wake kutenguliwa na Mahakama au madiwani hao kuhamia CCM.

Katika Mkoa wa Arusha, Juni 2017 Chadema ilipoteza madiwani nane ambao ni Credo Kifukwe (Muriet), Anderson Sikawa (Leguruki), Emmanuel Mollel (Makiba), Greyson Isangya (Maroroni) na Josephine Mshiu (Viti Maalumu).

Kabla hilo halijapoa, Julai 25, 2017 madiwani watatu wa Chadema katika Halmashauri ya Wilaya ya Hai mkoani Kilimanjaro walitimkia CCM.

Madiwani hao ni Goodluck Kimaro (Machame Magharibi), Abdallah Chiwili (Weruweru) na Everist Peter Kimath (Mnadani).

Aidha, Agosti 23, 2017 Chadema ilipoteza madiwani watatu katika Manispaa ya Iringa ambao ni Baraka Kimata (Kata ya Kitwiru), na wawili wa Viti Maalum ambao ni Husna Ngasi na Leah Mlelewa.

Mnamo Februari 2017, Chadema ilipoteza madiwani wawili katika Manispaa ya Shinyanga ambao ni Sebastian Peter (Kata ya Ngokolo) na Zacharia Mfuko (Kata ya Masekolo) ambao aliamua kuachia nyadhifa zao kwa kile walichoeleza kuwa ni migogoro isiyokwisha.

Machi 2016, Chadema ilimpoteza Diwani wa Kata ya Siuyu katika Halmashauri ya Wilaya ya Ikungi, Jared Mahami Jastn (35) amaye alihukumiwa kwenda jela miezi sita baada ya kutiwa hatiani kwa kosa la kuikosesha serikali mapato.

Ilidaiwa mahakamani hapo kwamba mnamo Februari mbili mwaka huu saa tatu asubuhi huko katika mnada wa kijiji cha njiapanda wilaya ya Singida, mshitakiwa kwa makusudi alimzuia afisa mwidhiniwa Amina Abdallah wa kampuni ya Abada Care Investment, kufanya kazi ya kukusanya ushuru wa halmashauri ya wilaya ya Ikungi.

Mapema ilidaiwa katika Mahakama hiyo iliyokuwa chini ya hakimu Simon Jiwawa Kayinga, kuwa katika siku ya tukio, alitenda makosa mawili ikiwa ni kumuzuia afisa Amina kufanya kazi yake ya kukusanya mapato ya halmashauri kitendo ambacho ni kinyume na kifungu cha 12 para ya (e) sheria ndogo ndogo ya halmashauri ya Ikungi.

Kata ambazo zitashiriki kwenye uchaguzi huo ni kama ilivyoanishwa kwenye jedwali hapa chini:

Zifuatazo ni Kata 43 zitazohusika katika Uchaguzi Mdogo wa Madiwani:

Na	MKOA	HALMASHAURI	KATA
1.	ARUSHA	Halmashauri ya Wilaya ya Arusha	Musa
		Halmashauri ya Jiji la Arusha	Muriet
		Halmashauri ya Wilaya ya Meru	Ambureni
		Halmashauri ya Wilaya ya Meru	Ngabobo
		Halmashauri ya Wilaya ya Meru	Maroroni
		Halmashauri ya Wilaya ya Meru	Leguruki
		Halmashauri ya Wilaya ya Meru	Makiba
		Halmashauri ya Wilaya ya Monduli	Moita
2.    2	DAR ES SALAAM	Halmashauri ya Manispaa ya Kinondoni	Mbweni
		Halmashauri ya Manispaa ya Temeke	Kijichi
		Halmashauri ya Manispaa ya Ubungo	Saranga
3.	DODOMA	Halmashauri ya Wilaya ya Mpwapwa	Chipogolo
4.	GEITA	Halmashauri ya Wilaya ya Nyang’wale	Bukwimba
		Halmashauri ya Wilaya ya Geita	Senga
5.	IRINGA	Halmashauri ya Manispaa ya Iringa	Kitwiru
		Halmashauri ya Wilaya ya Kilolo	Kimala
6.	KILIMANJARO	Halmashauri ya Manispaa ya Moshi	Bomambuzi
		Halmashauri ya Wilaya ya Hai	Mnadani
		Halmashauri ya Wilaya ya Hai	Machame Magharibi
		Halmashauri ya Wilaya ya Hai	Weruweru
7.	LINDI	Halmashauri ya Manispaa ya Lindi	Chikonji
		Halmashauri ya Wilaya ya Ruangwa	Mnacho
8.	MANYARA	Halmashauri ya Wilaya ya Hanang’	Nangwa
9.	MBEYA	Halmashauri ya Wilaya ya Rungwe	Ibighi
10.	MOROGORO	Halmashauri ya Wilaya ya Morogoro	Kiloka
		Halmashauri ya Wilaya ya Malinyi	Sofi
11.	MTWARA	Halmashauri ya Wilaya ya Tandahimba	Milongodi
		Halmashauri ya Manispaa ya Mtwara  Mikindani	Reli
		Halmashauri ya Mji wa Masasi	Chanikanguo
12.	MWANZA	Halmashauri ya Wilaya ya Misungwi	Kijima
		Halmashauri ya Jiji la Mwanza	Mhandu
13.	RUKWA	Halmashauri ya Manispaa ya Sumbawanga	Sumbawanga
14. 14	RUVUMA	Halmashauri ya Wilaya ya Tunduru	Lukumbule
		Halmashauri ya Wilaya ya Tunduru	Kalulu
		Halmashauri ya Wilaya ya Mbinga	Muongozi
15.	SINGIDA	Halmashauri ya Wilaya ya Ikungi	Siuyu
16.	SIMIYU	Halmashauri ya Wilaya ya Maswa	Nyabubinza
17.	SONGWE	Halmashauri ya Wilaya ya Momba	Ndalambo
18.	TABORA	Halmashauri ya Wilaya ya Nzega	Nata
		Halmashauri ya Wilaya ya Urambo	Muungano
19.	TANGA	Halmashauri ya Mji wa Korogwe	Majengo
		Halmashauri ya Wilaya ya Lushoto	Lukuza
		Halmashauri ya Wilaya ya Bumbuli	Mamba

Imetolewa leo tarehe 04 Oktoba, 2017.

Jaji (R) Semistocles S. Kaijage

MWENYEKITI

TUME YA TAIFA YA UCHAGUZI