VIDEO: NEC YATEUA MADIWANI WANAWAKE 8 WA VITI MAALUM CHADEMA NA CCM

Tume ya Taifa ya Uchaguzi (NEC) imefanya uteuzi madiwani nane (8) wanawake wa viti maalum kujaza nafasi wazi  za madiwani katika halmashauri nane (8) za Tanzania Bara.
Mwenyekiti wa Tume ya Taifa ya Uchaguzi (NEC) Jaji wa Mahakama ya Rufaa, Semistocles Kaijage amesema kuwa uteuzi huo umefanyika baada ya NEC kupokea taarifa kutoka kwa Waziri mwenye dhamana ya Serikali za Mitaa kuitaarifu Tume ya Taifa ya Uchaguzi uwepo wa nafasi wazi za Madiwani wanawake wa Viti Maalum.


Jaji Kaijage amesema kwa kuzingatia masharti ya kifungu cha 13(1) cha Sheria ya Uchaguzi ya Serikali za Mitaa, Tume ilipokea taarifa ya uwepo wa nafasi wazi za Madiwani wanawake wa Viti Maalum kupitia Chama cha Mapinduzi (CCM) na Chama cha Demokrasia na Maendeleo (CHADEMA) kufuatia walioteuliwa awali kufariki dunia au kujiuzulu.

Amewataja madiwani hao kuwa ni Ajira Rajabu Kalinga (CCM-Halmashauri ya Wilaya ya Songea), Mary Kazindogo Mbilinyi (CCM-Halmashauri ya Wilaya ya Makete), Zainab Abdi Mabrouk (CCM-Halmashauri ya Manispaa ya Kongwa).

Wengine ni Ndugu Restuta Aloyce Gardian (CCM-Halmashauri ya Wilaya ya Muleba), Siglinda Sylvesta Ngwega (CCM-Halmashauri ya Wilaya ya Morogoro), Zena Saadi Luzwilo (CCM-Halmashauri ya Mji Kahama), Neema Michael Massawe (CHADEMA-Halmashauri ya Wilaya ya Monduli) na Teodola Myula Kalungwana (CHADEMA-Halmashauri ya Manispaa ya Iringa).