TANZANIA NA UINGEREZA KUSHIRIKIANA KIBIASHARA

Waziri wa Fedha na Mipango Mhe. Dkt. Philip Mpango (Mb) (kulia) akieleza kuhusu juhudi za Serikali katika kutengeneza mazingira mazuri ya kibiashara wakati wa mkutano na Mjumbe wa Waziri Mkuu wa Uingereza anayeshughulikia Biashara Bw. Lord  Hollick katika ukumbi wa Wizara hiyo jijini Dar es salaam.

Mjumbe wa Waziri Mkuu wa Uingereza anayeshughulikia Biashara Bw. Lord Hollick (kushoto) akifafanua jambo wakati wa Mkutano kati yake na Waziri wa Fedha na Mipango Mhe. Dkt. Philip Mpango (Mb) (hayupo pichani) kuhusu nia ya kuwekeza katika ujenzi wa Uwanja wa ndege wa Msalato Dodoma, Kulia ni Balozi wa Uingereza nchini Tanzania Bi. Sarah Cooke, Mkutano uliofanyika  Makao Makuu ya Wizara jijini Dar es salaam.

Wajumbe wa Mkutano walioongozana na Mjumbe wa Waziri Mkuu wa Uingereza anayeshughulikia Biashara Bw. Lord Hollick, wakisikiliza kwa makini maelezo ya Waziri wa Fedha na Mipango Mhe. Dkt. Philip Mpango (Mb) (hayupo pichani), kuhusu umuhimu wa kufanya biashara ya bidhaa zilizoongezwa thamani ili kukuza viwanda vya ndani, wakati wa mkutano huo jijini Dr es salaam.

Mjumbe wa Waziri Mkuu wa Uingereza anayeshughulikia Biashara Bw. Lord Hollick (kulia) akisisitiza kuhusu kuendelea kuimalisha uhusiano wa kibiashara kati ya Tanzania na Uingereza huku Waziri wa Fedha na Mipango Mhe. Dkt. Philip Mpango (Mb) (kushoto) akimsikiliza kwa makini katika ukumbi wa Wizara hiyo jijini Dar es salaam.

Waziri wa Fedha na Mipango Mhe. Dkt. Philip Mpango (Mb) (kushoto) akipeana mkono na Mjumbe wa Waziri Mkuu wa Uingereza anayeshughulikia Biashara Bw. Lord Hollick (kulia) baada ya kumalizika kwa mkutano kati yao kuhusu Mahusiano ya kibiashara kati ya nchi hizo mbili, uliofanyika katika ukumbi wa Wizara hiyo jijini Dar es salaam.

Benny Mwaipaja, WFM, Dar es Salaam

Waziri wa Fedha na Mipango Dkt. Philip Mpango ameitaka nchi ya Uingereza kutazama uwezekano wa kufanya biashara na Tanzania kwa kununua bidhaa zilizoongezwa thamani badala ya hali ya sasa ambapo nchi hiyo imekuwa ikinunua bidhaa ghafi ilihali ikiingiza nchini bidhaa zake za viwandani.

Dkt. Mpango ameyasema hayo alipokutana na Mjumbe wa Waziri Mkuu wa Uingereza anayeshughulikia masuala ya Biashara Bw. Lord Hollick ailipo tembelea Makao Makuu ya Wizara hiyo jijini Dar es salaam.

Amesema Tanzania inataka kuona inauza bidhaa zake zenye thamani ambazo zitatokana na maendeleo makubwa ya viwanda hapa nchini ikiwa ni Sera ya nchi kuwa na uchumi wa kati unaotegemea viwanda ifikapo mwaka 2025.

Nchi ya Uingereza imekuwa ikifanya biashara na Tanzania kwa kiasi kikubwa na takwimu zinaonesha nchi hiyo inaingiza bidhaa zenye thamani mara nane ya Tanzania jambo ambalo linatakiwa kurekebishwa ili biashara iwe na manufaa kwa pande zote mbili.

Miongoni mwa bidhaa ghafi ambazo zimekuwa zikisafirishwa kwenda uingereza ni pamoja na Chai, kahawa na madini ya vito huku Uingereza ikiingiza bidhaa za viwandani zenye thamani kubwa ikijumuisha mashine (mitambo),vifaa vya umeme, bidhaa za plastiki na madawa.

Kwa upande wake, Mjumbe wa Waziri Mkuu wa Uingereza anayeshughulikia Biashara Bw. Lord  Hollick amebainisha nia ya nchi yake kutaka kuwekeza kwa kiasi kikubwa katika nchi za Afrika ikiwemo Tanzania baada ya Taifa hilo kuamua  kujiondoa katika Umoja wa Ulaya.

Maeneo ambayo Uingereza inapenda kuwekeza Tanzania ni katika Sekta ya Kilimo, Nishati ya Umeme na Usafirishaji huku kwa sasa akionesha nia ya ya nchi yake kuwekeza katika ujenzi wa kiwanja cha Ndege cha Kimataifa cha Msalato katika Makao Makuu ya nchi - Dodoma. 

Pia nchi hizo mbili zimekubaliana kuandaa mkutano utakao wakutanisha Serikali na Sekta Binafsi ya Tanzania kwa upande mmoja na wawekezaji wakubwa kutoka Uingereza na nchi nyingine za Ulaya ambao utasaidia kukuza uwekezaji na biashara na kufungua fursa mbalimbali za kiuchumi kwa manufaa ya wananchi wa Tanzania na  nchi hizo za Ulaya ikiwemo Uingereza.